(( العرس بين { الحآضر , والماضي } ))

السلام عليكم ورحمة الله وبركآته

شحآلكم الربع عساكم مرتاحين

,


هذآ الموضوع هو عبآرة عن مقارنة بين

* عرس اول *
Vs
* عرس ديل وقت ذي *

,

نبدأ بالمحاور الرئيسية :

5- سن الزواج
4- مكان الزواج
3- الاهازيج او انواع الاحتفالات
2- الخلاصة
1- الخاتمة


_______________________________________



بندأ سن الزواج :


- عرس ايام اول :

في زمان اول كان الواحد يتزوج وهو في عمر نراه الآن صغيراً
وكانو هم يرونه في تلك الايام عمر الرجل الذي يستطيع تحمل مصرف
اسرة والسيطرة عليها

فكانت اعمار اللي يتزوجون في ذاك الزمن تتراوح مابين ال 13-15

( يدي ابو ابويه ربي يحفظه تزوج وهو عمره 14 عشر سنة ولله الحمدل )



- عرس هالايام :

اصبح في هالايام من النادر ان نشوف بعض الشباب متزوج وهو عمره 18 او 19
تحصل الكثيرين يتزوجون من 23 وفوق والبعض في الثلاثينات وفوق وحتى النساء ايضاً



_____

مكآن الزواج سابقاً :

كان يوم العرس قبل في نفس يوم الملجة وكان عرس الحريم والرياييل في نفس الوقت
ويكون العرس في الفريج او القرية او المنطقة اللي ساكنين فيها الزوجين
قبل محد كان يتزوج من خارج قريته او فريجه , عرس الرياييل كان يكون في القهوة
ولا ساحة الفريج ولا بيت المعرس , وعرس الحريم يكون في بيت العروس .


مكآن الزواج هالايام :

عرس الرجال : عرس الرجال دايماً يكون في احدى القاعات او الفنادق ونادراً مايكون في مطعم او في منزل العريس .

عرس النسآء : معضم اعراس النساء تكون في القاعات المغلقة في الفنادق او الصالات او الجمعيات الاسلامية ونادراً نادراً ماتكون في المنزل , ويوم الحنآء يكون نادراً في القاعة ومعضم الاوقات في المنزل .

__________________


الاهآزيج وانواع الاحتفالات :

قديماً : هناك الكثير من انواع الاهازيج والاحتفالات كانت في ذاك الزمان ومعضمها استمر للوقت الحالي ومعضمها انقطع وهذه بعض الرقصات الشعبية او الاحتفالات في السابق على حد علمي :

عرس الرجال :





1- فرقة الليوا :

( المشكلة معلوماتي في هالسوالف سطحية ) الليوا عبارة عن رقصة شعبية ياديها مجموعة من الرياييل واتكون انهم يدورون وفالنص اللي يدقون , وهم يدقون ويدورون يقولون بالبطيئ

بيبي متوه سقاني مرمرة الشيخ زايد عسى الله ينصره
لا إله إلا الله ربي توبة سافر حبيبي ضربتني نوبة




: بعض الصور :



تم تصغير هذه الصورة. اضغط هنا لمشاهدة الحجم الكامل. أبعاد الصورة الاصلي هو 510*390.

اعذروني مالقيت غير هالصورة
,









- المالد :




وهي عبارة عن سطرين من الرجال عندهم الطار وفي اثنين ينشدون وتبدى المالد عن طريق شلة عن رسول الله صلى الله وعليه وسلم ومن بعدها شوية اذكار بعدها يبدى الدق على الطار والانشاد اناشيد اسلامية وجهة وحدة اللي يكون فيها الرياييل عندهم الطار والجهة الثانية يقومون بحركة يحطون ايد على ايد ويقومون بالتحرك يمين يسار بشكل منتضم << من معلوماتي الشخصية لان اكثر من مرة سوو في اعراس حضرتها المالد , والحين هي شبه انقرضت بصراحة







,





- فرقة العيالة او الرزيف واليولة :

طبعاً مافي حد منكم مايعرف هذا الفن الجميل الاصيل , وهذي بعض الصور

: صور :

صورة الوالد القائد المغفور له باذن الله
ابويه الشيخ زايد بن سلطان الله يرحمه
وهو ايوول




,



,





طبعاً هذي الرقصة موجودة الين الحين والحمدلله , ودوم يسوونها مب بس في الاعراس حتى في المناسبات الرسمية او الترحيبات او او .. الخ ,
وماتغير فيها الشي الكثير يمكن بس اللي تغير ان قبل كانو ايولون فـ التفق لكن الحين سلاح مفصل من خشب وستيل , ولكن نادرين اللي ايويلون بالتفق


,


الندبة والرواح :


هذي الندبة موجودة عند اخوانا الشحوح وتتكون يمكن من ستين او سبعين رجل يصطفون البعض عنده طبول والبعض سيوف والمطارق والتفاقه وطبعاً معضمكم يعرف الندبة وهذي بعض الصور :


: صور :

هذه الصورة بحجم اخر انقر هنا لعرض الصورة بالشكل الصحيح ابعاد الصورة هي 585x395 الابعاد 69KB.
تم تصغير هذه الصورة. اضغط هنا لمشاهدة الحجم الكامل. أبعاد الصورة الاصلي هو 585*395.




,




,





,

الشلة :

الشلة الكل يعرفها هي عبارة عن تلحين القصايد والقائها بشكل حلو وكانو يستخدمون مع الشلة اللي هي الربابة .. شرات الكمان هذي الايام لكن ايام قبل


اللي عاليمين يشل واللي عاليسار يعزف عالربابة



,

صورة الربابة





,,
,,


عرس النسآء :

عرس النساء كان فيه دق واهازيج والكلللللوش اللي يسمونها اضن زغرطة
بصراحة خبرتي فقيرة في هالمجال ولكن كان في اشياء كانو يسونها

في يوم الحنا وهو يسرون الحريم من اهل المعرس والعروس ويتحنون في بيت العروس
يحنن ريلاتهن واياديهن ,

وفي شي يسمونه الزهبة , وهو ان الحريم يلسن ويراوون اغراض العروس من ثياب وذهب وبخور وغيره ,


__
__

حديثاً :

حديثاً عدنا العيالة والليوا للحين موجودة واتحصلون بعض الاعراس فيها ال DG واللي اييب مغنيين ومطربين ولا فرقة مغنين ولا فرقة انشاد والبعض هداه الله اييب الام علاية , والندبة ايضاً بعدها موجودة عند الشحوح ,

وفي شي يديد يعني طلع .. ويكون بعد العرس ويكون في معضم الاعراس وهو الاستعراض بعد العرس اتشوفون اتيمعو الربع في مواقف الصالة ولا سدو الشارع وبدا كم واحد يفجر تايره

_____________________
_________________________

الخلاصة :

بوجهة نظريي , نرى ان العرس الحين تغير وايد عن العرس قبل وصارت له مجالات عديدة وصارت له طرق كثيرة واشياء يديدة طلعت , مثل بعض الاباء في مايحضرون اعراس بنتهم ويعتبرونه من بعض التقاليد الاولية , وعندكم معضم الاعراس هذه الايام تكون العروسة جالسة في كوشة فالقاعة او فالبيت وبعد مايتعشون يدش الريال ويجلس ينب العروس , قبل كانو الناس على قد حالهم الكل يحاول يعبر عن فرحته فالعرس باي شي وكانو يعلقون مثل قراطيب ملونة فالفريج كله وفالسكيك والحين انشوف ان الحال تغير وصارو الربع يحطون ليتات العرس وباشكال حلوة ومتنوعة وفنانة , طلعت بعض الرقصات اليديدة والاساليب المتطورة فالاعراس وصار العرس فيه اكثر من فرقة مثل العيالة والليوا في نفس الوقت , مافي مانع من كل هالاشياء هذي فرحة والكل له الحق يفرح مثل مايبا .

___________________


الخآتمة :

شكراً لكم لحسن متابعتكم اخواني واخواتي الكرام .. وان شاء الله يكون الموضوع عيبكم
للعلم اني لم انقل شئ كله الحمدلله من المعلومات البسيطة لي عندي ولكن نقلت الصور وان شاء الله اتكونون استفدتو واذا في اي غلط او ملاحظة او استفسار او اقتراح خبروني لاهنتم

والسموحة عالقصور

يعطيج العااافيه ع الموضوووع

وربي مايحرمنا من يديدج